Geir: þú verður að hjálpa okkur að styðja við bakið á þér!

Það var erfitt fyrir mig að horfa upp á formann Sjálfstæðisflokksins í vörn í Kastljósinu í kvöld. Í þessari sömu vörn höfum við, sem erum yfirlýstir sjálfstæðismenn, staðið undanfarna mánuði og vikur. Geir, þú stóðst þig vel og vannst varnarsigur. Kannski er ekki hægt að ætlast til meira eins og sakir standa.

Ég ber mikla virðingu fyrir Geir H. Haarde og veit af eigin reynslu, að þarna fer grandvar og heiðarlegur maður. Ég geng svo langt að segja, að ég myndi setja heiður minn að veði fyrir þennan mann. Að sjálfsögðu hafa honum, Davíð Oddssyni og reyndar mörgum öðrum - sjálfstæðismönnum, sem flokksmönnum annarra flokka - orðið á alvarleg mistök á undanförnum árum, mánuðum og vikum. Í ljós hefur komið að sum mistakanna voru því miður grafalvarleg og eiga eftir að verða þeim dýrkeypt.

Í ljósi þessa hljómar það kannski hálf hjákátlega í eyrum sumra, að ég taki upp hanskann fyrir Geir og fleiri ráðamenn og vilji nákvæmlega núna tala um afrek þessara manna allt frá árinu 1991. Ég vil halda því til haga, að það voru þessir menn, sem komu Íslandi á þann stall, sem við nú erum að falla niður af. Þessu megum alls ekki gleyma þegar við "dæmum" þessa menn. Sá kasti fyrsta steininum, sem syndlaus er, sem aldrei lofaði útrásina, víkingseðlið og ódugandi dugnað og gáfur þessar "einstöku" þjóðar. Taki hver til sín það, sem hann eða hún á!

Það, sem mér sárnar er, að Geir skuli ekki bera gæfu til að segja skilið við þá, sem mesta ábyrgð bera í þessu stærsta áfalli Íslandssögunnar frá stofnun lýðveldisins. Það má sennilega rekja til þess, hversu góður og heiðarlegur drengur er þar á ferð. Þeir sem þurfa að víkja eru að sjálfsögðu Davíð Oddsson og stjórn Seðlabankans og Jónas Fr. Jónsson, forstjóri Fjármálaeftirlitsins, og stjórn þeirrar stofnunar. Þeir sem þurfa að sæta ábyrgð eru útrásarpésarnir og þeir sem stjórnuðu bönkunum. Rannsókn þessara mála verður að hraða, sem mest má og það verður að fá til starfsins bestu erlenda sérfræðinga. Annars er allt það, sem við sjálfstæðismenn höfum unnið að undanfarin 17 ár í mikilli hættu.

Jafnframt finnst mér skjóta skökku við, þegar ráðherra og þingmenn Sjálfstæðisflokksins segja, að engin ástæða sé til að endurskoða stjórnarsáttmálann, þrátt fyrir gjörbreyttar aðstæður í þjóðfélaginu. Landsmenn eru að skoða alla sína sáttmála þessa dagana. Aðstæður allra Íslendinga hafa gjörbreyst á nokkrum vikum. Fólk er að endurskipuleggja fjármál sin og sumt fólk er jafnvel að velta fyrir sér grundvallarlífsskoðunum sínum. Sumir - auðvitað ekki íhaldshundar eins og ég -  eru jafnvel að skipta um stjórnmálaskoðun. Hvers vegna gildir ekki það sama um stjórnmálamenn? Endurskoða þeir aldrei afstöðu sína, þrátt fyrir að allar forsendur breytist?

Eitt af þeim málum, sem fólk er að skipta um skoðun á - og er hvað fyrirferðarmest í umræðunni núna - er ESB aðild og upptaka evru. Hvernig getur forsætisráðherra, ráðherrar Sjálfstæðisflokksins og þingmenn enn og aftur fullyrt, að þetta mál sé hreinlega ekki á dagskrá. Hvernig er hægt að segja þetta, þegar þjóðin spyr sig þeirrar spurningar, hvort Geir og Björgvin séu að standa sig frábærlega í hlutverkum sínum, sem þrotabússtjórar eða dánarbússtjórar?

Geir - og aðrir þeim stjórnmálamenn, sem nú eru á þingi - verða síðan að taka dómi okkar kjósenda í næstu kosningum, sem ég hygg að séu ekki langt undan og síðar dómi sögunnar. Ég er þó sammála Geir, að ekki væri gott að slíta þingi á næstu mánuðum og efna til kosninga, því það er ekki það, sem við þurfum á að halda ofan í þetta mikla áfall, sem á okkur hefur dunið. Ljóst er þó, að almenningur krefst þess, að þingmenn endurnýji umboð sitt ekki seinna en næsta vor.

Geir og Sigmar voru báðir í erfiðum hlutverkum í kvöld og mátti vart á milli sjá hver stóð sig betur!

Við munum ekki láta kúga okkur

Athugasemdir

[Soffía (IP-tala skráð) 22.10.2008 kl. 22:48]

Það er skiljanlegt að Geir sé ekki þessa dagana að spá í endurskoðanir á eigin afstöðu á málefnum. Maðurinn stendur á haus að reyna að bjarga því sem hægt er. Það kemur og hann áttar sig á því hvað þarf að gera þegar kemur að "intern" málum, hann er í "extern" hlutanum núna.

Sammála þér að þarna fer ljúfur, heiðarlegur og traustur maður, en það var bara ekki nóg síðasta árið. Hann hefði þurft að átta sig á þessum mönnum sem stýrðu bönkunum, en við verðum að passa að kalla þá ekki útrásarvíkinga lengur því sannir útrásarvíkingar eru til og eru að vinna heiðarlega í sínum vexti.

[Hans Haraldsson (IP-tala skráð) 22.10.2008 kl. 22:55]

ESB er gervilausn. Við stöndum frammi fyrir bráðavanda en ESB aðild er langtímaráðstöfun. Það eitt ætti að segja okkur að ESB áköll núna eru lýðskrum.

Sumir halda því fram að ESB sé besta leiðin til þess að vernda framtíðarhagsmuni Íslands. Þetta segja þeir þótt að við séum í miðju upplausnarástandi og höfum í raun ekki nema óljósar hugmyndir um það hverjir framtíðarhagsmunir okkar séu. Skrum líka.

Hvernig væri það að ESB-sinnar væru krafðir svara, skýrra svara, um það nákvæmlega hvernig ESB aðild á að verða bjargráð okkar?

[Vésteinn Valgarðsson, 23.10.2008 kl. 04:24]

Ég skal kasta fyrsta steininum. Aldrei hef ég lofsungið þessa útrás.

Þú lifir í blekkingu ef þér finnst Geir vera að standa sig vel. Hann gerir það alls ekki, því miður.