Kemur engum á óvart

Það getur varla komið nokkrum á óvart að aflaverðmæti hafi dregist saman og getur varla verið nokkrum manni heldur áfall, þar sem aflaheimildir í þorski voru jú minnkaðar svo um munaði fyrir þetta ár.

Búast má við að það sama verði uppi á teningnum á næsta ári, en síðan byrja þeir nú vonandi að bæta í árið 2010.

Hún er erfið fiskifræðin líkt og hagfræðin og þeir menn ekki öfundsverðir, sem stunda þær fræðigreinar. Það er betra að átta sig á afleiðingum friðunar rjúpu og annarra tegunda, sem á landi lifa. Því þær má þó alltént frekar telja en þær tegundir, sem búa í djúphöfunum. Auðveldara er einnig að átta sig á vistkerfunum á landi en í sjó og því hafa menn hreinlega meiri þekkingu á þeim en vistkerfi hafanna, sem eru þó örugglega álíka flókin ef ekki flóknari og þau sem á landi eru.

Einhvernvegin finnst manni þó ganga hálf brösuglega að byggja upp fiskistofnana við landið. Stundum er mér hugsað til þeirra tíma þegar ég var sem barn með pabba úti á sjó og sá skip af öllum þjóðernum á miðunum svo langt sem augað eygði. Ég reyndi ekki einu sinni að telja þau, svo mörg voru þar að veiðum.

Skringilegt að eftir að Íslendingar sjálfir fengu yfirráð yfir miðunum með sinn "litla" flota, skuli allt fara í bál og brand og ofveiðin aldrei meiri. Mig hefur alltaf grunað að þetta hafi meira að gera með veiðar okkar á æti fisksins en menn vilja viðurkenna. Ég held að við verðum að velja á milli þess að veiða æti fisksins eða fiskinn sjálfan. Jafnframt held ég að sá gífurlegi fjöldi hvala, sem er í kringum landið hafi meiri áhrif en menn ætla.

Ég er enginn fræðimaður í þessum efnum og einungis spámaður, en það er eitthvað bogið við þetta allt saman, það er víst.

Aflaverðmæti dregst saman

Athugasemdir

[Níels A. Ársælsson., 16.6.2008 kl. 11:25]

Sæll.

Gengdalausar loðnu og kolmunnaveiðar í flottrol eiga stórann part í hruni vistkerfisins við Ísland.

Það er þekkt staðreynd að smug fisks í möskvum flottrolla drepur allt að 15 fallt það magn sem situr eftir í trollinu.