Geir er glúrinn

Það var skynsamleg ákvörðun hjá Geir að ráða Tryggva Þór Herbertsson hagfræðing til ráðgjafar næstu sex mánuði. Tryggvi er ljónvelgefinn og jarðbundinn maður og sýndi það og sannaði sem forstöðumaður Hagfræðistofnunar Háskóla Íslands.

Ég gruna Geir um að lúra á fleiri og stærri útspilum þegar líður á sumarið.

Útgáfa reglugerðar, sem heimilar Íbúðalánasjóði að endurfjármagna húsnæðislán fjármálafyrirtækja, er  mikilvægt skref í átt til að koma í veg fyrir óróa á fasteignamarkaði.

Annað skref kom einnig í ljós í dag, en það var að í undirbúningi er lagafrumvarp um að Íbúðalánasjóður fái heimild til að fjármagna og kaupa ný íbúðalán af fjármálafyrirtækjum, sem mun einnig hjálpa mikið.

Það sem við megum síst við í augnablikinu er verðhrun á fasteignum, sem hefði ekki aðeins hræðilegar afleiðingar fyrir stóran hluta þjóðarinnar, sem skipt hefur um húsnæði undanfarin ár, heldur gengi endanlega frá byggingariðnaðinum í landinu.

Án efa er unnið af krafti hjá Seðlabankanum við leit að láni erlendis, sem er á ásættanlegum kjörum.

Þótt margir óski sér meiri viðbragða frá ríkisstjórninni er ljóst að í svona ástandi er það mikilvægasta að fara ekki á taugum og gera eitthvað vanhugsað. Ástandið breytist frá degi til dags og því erfitt að segja til um hvaða bragðs eigi að grípa næstu vikur og mánuði.

Ég er því sammála þeim, sem segja að lausnin á erfiðleikum dagsins í dag er ekki aðild að ESB eða upptaka evru. Þennan slag verðum við að taka sjálf og á okkar forsendum.

Hins vegar er rétt að skoða ESB aðild og upptöku evru þegar umræðan snýr að framtíðinni.

 

Geir fær efnahagsráðgjafa

Athugasemdir

[Björg Árnadóttir, 20.7.2008 kl. 13:51]

Gott að ráða sér góða menn til aðstoðar. Svo er hins vegar spurningin um hversu mikið er farið eftir góðra manna ráðum? Það á eftir að koma í ljós.

Ég hef ekkert kynnt mér þessar heimildir til endurfjármögnunar sem íbúðalánasjóður er að fá. Hitt þykir mér í raun mjög slæmt að bankarnir komist upp með að haga sér eins og fáráðar á húsnæðislánamarkaði og síðar þegar allt er komið í hönk sé þeim bjargað af ríkinu! Ef þetta hefði ekki svona gríðarmikil áhrif á einstaklingana í landinu þá væri réttast að láta bankana sitja í súpunni. Ef þeim er bjargað á þennan hátt er alveg bráðnauðsynlegt að tryggja jafnframt að þeir geti ekki hagað sér svona eða á einhvern enn annan jafn slæman eða verri hátt í framtíðinni. Það er einmitt góðra manna verkefni að finna út hvernig best er að gera.

[Guðbjörn Guðbjörnsson, 21.7.2008 kl. 13:59]

Mikið svakalega er ég sammála þér. Ég var nú einn af þessum glópum, sem hélt að bönkunum væri treystandi fyrir íbúðalánum hér líkt og annarsstaðar.

Sú er líklega ekki raunin og hafði ég hreinlega rangt fyrir mér, þegar ég hélt að hægt væri að leggja niður Íbúalánasjóð.

Hitt er svo annað mál að við verðum að halda byggingariðnaðinum gangandi og enginn er að tala um að þeim verði hjálpað svo mikið að þeir sleppi frá þessu með skrekkinn. Auðvitað verða byggingaverktakar og bankar að axla ábyrgð af gjörðum sínum, en við getum samt ekki setið hjá og sé þjóðfélaginu blæða út.