Friðrik Sophusson talar fyrir hönd meirihluta sjálfstæðismanna

Ég er sannfærður um að Friðrik Sophusson talar fyrir hönd meirihluta sjálfstæðismanna, þegar hann segir, að við ættum að ganga til ESB aðildarviðræðna. Þorsteinn Pálsson og fleiri fyrrverandi forystumenn flokksins hafa undanfarin misseri viðrað svipaðar skoðanir á þessu umdeilda máli. Niðurstöður aðildarviðræðna verða að sjálfsögðu bornar undir íslensku þjóðina í þjóðaratkvæðagreiðslu og því er í raun engin áhætta fólgin í aðildarviðræðum.

Þeir sjálfstæðismenn, sem ekki vilja ganga þessa leið, eru auðsjáanlega hræddir við, að þjóðin samþykki slíka niðurstöðu og vilja af þeim sökum einfaldlega ekki taka þá áhættu að fara í aðildarviðræður og þjóðaratkvæðagreiðslu. Það er einkennilegt þegar fólk vill kúga meirihluta þjóðarinnar í eigin þágu.

Það er skoðun mín, að aðildarviðræður við ESB verði samþykktar á næsta Landsfundi Sjálfstæðisflokksins. Það er hins vegar engin leið að sjá, hvort niðurstöður viðræðna við ESB hljóti náð fyrir augum íslenskra kjósenda, því niðurstöðurnar liggja ekki fyrir.

Andstaða formanns Sjálfstæðisflokksins og nær alls þingflokksins við að ganga til viðræðna kemur mér sífellt á óvart. Ljóst er að þingmenn Sjálfstæðisflokksins verða að lýsa yfir skoðun sinni á þessu umdeilda máli í næsta prófkjöri flokksins til að kjósendur geti ákveðið hvaða þingmenn þeir vilja sjá á Alþingi.

Þjóðin fái að kjósa um ESB

Athugasemdir

[Jón Valur Jensson, 30.11.2008 kl. 03:32]

Nú ruglarðu, Guðbjörn. Það er einn flokkur með afgerandi meirihluta aðspurðra stuðningsmanna sinna í skoðanakönnunum gegn EBé-aðild, og sá er Sjálfstæðisflokkurinn. Ef hann vill veðja á að halda meirihlutafylgi sínu, ætti hann aldrei að styðja EBé-innlimun og ekki einu sinni "aðildarviðræður", enda eru þær óþarfar til að "finna út" hver stefna EBé er í auðlinda- og ákvarðanamálum. Svo mikið áttirðu þó að vita, félagi.

[Guðbjörn Guðbjörnsson, 30.11.2008 kl. 10:24]

Sæll Jón Valur

Það sem ég átti við eru auðvitað kjósendur og fyrrverandi kjósendur Sjálfstæðisflokksins. Líkt og þú veist - ef marka má skoðanakannanir - þá hefur fylgið hrunið af okkur undanfarna mánuði og við sjálfstæðismenn komnir niður í 25% fylgi. Það sem er þó gott í stöðunni er að 40% kjósenda eru óákveðnir. Þar eru tækifæri fyrir okkur sjálfstæðismenn að ná til baka þeim, sem hafa yfirgefið okkur en einnig í aðra, sem hugsanlega er óánægðir í öðrum flokkum. Við vitum að um helmingur þeirra, sem enn eru í flokknum, eru fylgjandi ESB aðild. Flestir af þeim, sem yfirgefið hafa flokkinn, hafa gert það af nokkrum ástæðum.

Tengsl margra sjálfstæðismanna hátt og lágt við útrásina hafa verið mikið og nægir þar að nefna nokkur nöfn: Þorgerði Katrínu Gunnarsdóttur, Árna Mathiesen, Illuga Gunnarsson, Kjartan Gunnarsson og Þórlind Kjartansson og svona mætti  í raun lengi telja einnig hvað þingmenn varðar. Að hafa slíkt fólk í forystu virkar ekki vel á hinn sauðsvarta almúga.

Síðan ber auðvitað að nefna almenna ábyrgð flokksins og ekki einstakra stjórnmálamanna vegna setu í ríkisstjórn undanfarin 17 ár. Við mörkuðum veginn í átt til frjálsræðis, sem var auðvitað hárrétt og á meðan góðæris af þeim sökum nutum við þess og fólk kaus okkur. Kjósendur treystu okkur til að halda góðærinu gangandi.

Nú kom í ljós að við brugðumst á vaktinni og settum fjármálakerfinu ekki nógu strangar reglur, þegar við slepptum þeim lausum. Seðlabankinn - þar sem fyrrverandi formaður Sjálfstæðisflokksins situr í skjóli flokksins - nýtti sín stýritæki ekki nógu vel og Fjármálaeftirlitið sinni eftirlitsskyldu sinni ekki sem skyldi. Að auki má síðan auðvitað varpa ábyrgð á ríkisstjórnirnar, sem voru við völd. Þetta gildir þó sérstaklega um um forsætisráðuneytið, sem ráðuneyti efnahagsmála, og fjármála- og viðskiptaráðuneyti, sem ráðuneyti ríkisfjármála og bankamála. Vafamál er þó, hvort fjármálaráðuneytið ber þarna mikla ábyrgð, þar sem það hefur ekki lengur eftirlitsskyldu með bönkum eða fjármálastofnunum.

Að mínu mati þarf að endurnýja þingflokkinn að einhverjum hluta og skoða breytingar í ríkisstjórn og forystu flokksins almennt. Þá þarf að fara í endurskoðun á stefnu flokksins með grundvallaratriði sjálfstæðisstefnunnar að leiðarljósi. Tekist verður á um aðild að ESB á landsfundinum í lok janúar og ég er sannfærður um að það væri flokknum fyrir bestu að sameinast um að fara í viðræður við ESB á forsendum okkar sjálfstæðismanna.

[Jón Valur Jensson, 2.12.2008 kl. 09:49]

Ég ítreka mitt fyrra innlegg og get bætt þessu við: 20. nóv. birti Morgunblaðið ýtarlega skoðanakönnun, sem Capacent Gallup gerði um EBé-aðild fyrir Samtök iðnaðarins (sjá þessa grein mína), og þar kom fram, að einungis "24% sjálfstæðismanna eru hlynnt aðild, en 54% andvíg"! Andstæðingar aðildar eru þannig 2,25 sinnum fleiri en fylgjendur hennar í Sjálfstæðisflokknum.

Flokkur, sem kysi það að líta ekki til slíkrar staðreyndar, yrði naumast sagður kunna fótum sínum forráð.

[Guðbjörn Guðbjörnsson, 2.12.2008 kl. 10:22]

Jón Valur:

Ég er líka að segja að hugsanlega hafir þú á réttu að standa.

Málið er bara að flokkurinn er ekki nema helmingur þess sem hann var - í stað 40% er hann 20% flokkur.

Allir nema ég og nokkrir aðrir sauðtryggir ESB sjálfstæðismenn eru enn í flokknum, afgangurinn er búinn að yfirgefa flokkinn!

[Jón Valur Jensson, 2.12.2008 kl. 18:08]

Tryggir fullveldissinnar eru þar ekki síður, eins og þú sérð, Guðbjörn minn.