Til Evrópu með Sjálfstæðisflokknum

Afstaða mín til aðildarviðræðna við ESB er lesendum þessa bloggs og félögum mínum í Sjálfstæðisflokknum ekkert launungamál. Ég vil hefja aðildarviðræður eins fljótt og mögulegt er. Hitt er svo annað mál, að slíkar viðræður taka a.m.k. 1-2 ár og að þeim loknum allsendis óvíst að samningurinn verði þess eðlis að Íslendingum sé stætt á að samþykkja hann. Hvort heldur sem er verðum við Íslendingar að vinna ötullega að lausn okkar mála næstu misserin með hjálp AGS og án nokkurra aðstoðar ESB. Ég set reyndar stórt spurningamerki við hvort ESB hefði aðstoðað okkur mikið í þeim erfiðleikum, sem við erum í.

Ég hef líkt og aðrir fylgst af athygli með skyndilegum áhuga VG á einhverskonar málamiðlun varðandi aðildarviðræður við ESB. VG hafa aldrei gert leyndarmál úr því að þeir eru alfarið andsnúnir aðildarviðræðum og hafa til þessa - ef eitthvað er - verið enn harðskeyttari í þeirri afstöðu sinni en sjálfstæðismenn. Innan vébanda Sjálfstæðisflokksins leynast eflaust enn 20-25% aðildarviðræðusinnar, þótt þeim hafi fækkað stórlega undanfarna 6 mánuði. Stór hluti þeirra sem yfirgefið hafa flokkinn voru einmitt þeir sem studdu ESB aðildarviðræður og er þetta m.a. útskýringin á því hversvegna færri sjálfstæðismenn styðja aðildarviðræður en áður. Ef þessi 20-25% aðildarviðræðusinna yfirgæfi flokkinn færi hann niður 18% fylgi eða um helming þess fylgis sem hann fékk í síðustu kosningum.

Hér að neðan er útdráttur úr ályktun Sjálfstæðisflokksins um Evrópumál:

 

Sjálfstæðisflokkurinn hefur talið að aðild að Evrópusambandinu þjóni ekki hagsmunum íslensku þjóðarinnar en jafnframt talið mikilvægt að sífellt sé í skoðun hvernig hagsmunum Íslands verði best borgið í samstarfi Evrópuríkja.

 

 

Komist Alþingi eða ríkisstjórn að þeirri niðurstöðu að sækja beri um aðild að Evrópusambandinu er það skoðun Sjálfstæðisflokksins að fara skuli fram þjóðaratkvæðagreiðsla um þá ákvörðun á grundvelli skilgreindra markmiða og samningskrafna.

 

 

Sjálfstæðisflokkurinn ítrekar þá afstöðu sina að hugsanleg niðurstaða úr samningsviðræðum um aðild Íslands að Evrópusambandinu verði ávallt borin undir þjóðaratkvæði.

 

 

Í ofangreindri ályktun landsfundar Sjálfstæðisflokksins er í raun opnað á þann möguleika, að Ísland gangi til aðildarviðræðna við ESB. Að vísu er sett skilyrði um að þjóðaratkvæðagreiðsla verði haldin, hvort landið eigi að fara í viðræður. Þessi tvöfalda atkvæðagreiðsla er að mínu mati algjör þvættingur, en opnun er þetta engu að síður.

Hér að neðan er síðan ályktun landsfundar VG um Evrópusambandið: 

 

Vinstrihreyfingin – grænt framboð telur nú sem fyrr að hagsmunum Íslands sé best borgið utan Evrópusambandsins. Sjálfsagt er og brýnt að fram fari opin og lýðræðisleg umræða um samskipti Íslands og sambandsins. Landsfundur VG leggur áherslu á að aðild íslands að ESB eigi að leiða til lykta í þjóðaratkvæðagreiðslu. Landsfundur telur mikilvægt að fyrirkomulag þjóðaratkvæðagreiðslu fái rækilega umræðu og að hliðsjón verði höfð af væntanlegum stjórnarskrábreytingum og hvað eðlilegt getur talist þegar afdrifaríkar ákvarðanir eru teknar um framsal og fullveldi.

 

VG opnuðu á sínum landsfundi einnig á ESB aðildarviðræður, líkt og sjá má skýrt hér að ofan og hvergi minnst á tvær atkvæðagreiðslur.

Ef við skoðum nú ályktun Framsóknarflokksins um Evrópusambandið:

 

... að Ísland hefji aðildarviðræður við Evrópusambandið á
grundvelli samningsumboðs frá Alþingi sem tryggi hagsmuni
almennings og atvinnulífs og þá sérstaklega sjávarútvegs
og landbúnaðar líkt og kveðið er á um í skilyrðum síðasta
flokksþings framsóknarmanna. Viðræðuferlið á að vera
opið og lýðræðislegt og leiði viðræðurnar til samnings
skal íslenska þjóðin taka afstöðu til aðildarsamnings í
þjóðaratkvæðagreiðslu í kjölfar upplýstrar umræðu

 

Ég sé ekki betur en að allir stjórnmálaflokkar hafi opnað á aðildarviðræður við ESB, en sett það sem skilyrði að þjóðin eigi síðasta orðið. Ég veit ekki til þess að nokkuð ríki hafi gengið í ESB án þess að bera aðildarsamninginn undir þjóðaratkvæði.

Ég sé því ekki að um einhverja stefnubreytingu hafi verið ræða undanfarna daga?

Athugasemdir

[Skarfurinn, 21.4.2009 kl. 20:38]

Þú ert greinilega í röngum flokki, Sjálfstæðisflokkurinn hefur engan dug til að sækja um aðild að ESB, enda flokkurinn klofinn í málinu eins og svo mörgum öðrum málum, Bjarni formaður breytir um skoðun vikulega og erfitt að greina hvað hann virkilega vill.

[Guðbjörn Guðbjörnsson, 21.4.2009 kl. 20:44]

Mig langar að svara þér með orðum skoðanabróður míns, Benedikts Jóhannessonar:

Hvað ætla ég þá að kjósa? Vinir mínir, fólk sem árum saman hefur aldrei látið sér detta annað í hug en Sjálfstæðisflokkinn, segjast margir ætla að spara blýið í kosningunum. Einstaka menn ætla að kjósa Samfylkinguna, þó ekki margir heyrist mér. Ég ætla að kjósa Sjálfstæðisflokkinn.

Hvers vegna? Vegna þess að þrátt fyrir afstöðuna í Evrópumálum á ég miklu meira sameiginlegt með Sjálfstæðismönnum en öðrum. Ég veit að verðmæti verða til með því að skapa heilbrigð skilyrði fyrir atvinnurekstur einstaklinga, ekki með ríkisrekstri. Tekjur ríkisins aukast ekki með því að hækka skattprósentur heldur með því að rækta þá stofna sem gefa af sér skattana.

Það er enginn vafi á því að Sjálfstæðisflokkurinn hefur valið sér ungan foringja sem vill leiða flokkinn úr ógöngum fortíðar og landið úr þroti. Ríkisstjórnarflokkarnir lúta á sama tíma forystu fulltrúa liðins tíma. Þess vegna er þrátt fyrir allt mest von fyrir landið að Sjálfstæðisflokkurinn styði umsóknarferlið og eflist þegar hér verður komið stöugt efnahagsumhverfi til frambúðar.

 

[Skarfurinn, 21.4.2009 kl. 20:56]

Málið er það að ef ekki verður send umsókn fljótlega lokumst við alveg úti, stefna ESB er að hægja verulega á að samþykkja ný aðildarlönd og því megum við engan tíma missa að mínu viti.

Tel þig á alrangri hillu varðandi kosningarnar en virði auðvitað þína skoðun, en tel Sjálfstæðisflokkinn ekki líklegan til að skipta um skoðun á næstunni, það virðist helst Ragnheiður Ríkharðsdóttir og Þorgerður Katrín sem eru jákvæðar gagnvart ESB í dag og Illugi og Bjarni voru það en tóku stóra u-beygju.

Takk fyrir ágætis  skoðanaskipti.

[Sigurður Þorsteinsson, 21.4.2009 kl. 22:01]

Mér skilst að í Samfylkingunni séu allir orðnir sammála um að ganga í ESB. Hér á blogginu undrast þeir ef einhverjir í öðrum flokkum vilja fara í aðildarviðræður. Á umræðunni má skilja Samfylkingunni eru allir sammála alltaf. Annað væri hringlandaháttur og vingl. Sagt er að þessi aðferðafræði hafi verið upp tekin eftir að einn flokksmanna var sendur í heimsókn til Kína og boðið á mikið flokksþing. Þar voru allir sammála, alltaf. Það var kallað skoðunin. Þegar hann kom heim, sagði heimshornaflakkarinn, þetta var eins og sjá 5000 skarfa í hóp. 100% hlýðni.

Annars eru kjósendur allra flokka sem vilja láta reyna á ESB aðild. Hins vegar hefur ekki verið skilgreint hvaða lágmarksárangri við viljum ná í þeim viðræðum. Það vilja margir sjá samningsmarkmið áður en í viðræður verður farið. Meirihlutinn vill viðræður. Hins vegar efast margir að niðurstaða þeirra viðræðna verði samþykkt af þjóðinni.

[marco (IP-tala skráð) 22.4.2009 kl. 01:00]

Til Evrópu með sjálfstæðisflokkinn!!  Gott slagorð. 

Gæti líka verið "Til Grænlands með sjálfstæðisflokkinn", eða "Til Jan Mayen með sjálfstæðisflokkinn". 

 Í versta falli "Til fjandans með sjálfstæðisflokkinn".

[Guðbjörn Guðbjörnsson, 22.4.2009 kl. 07:57]

Skarfurinn:

Ég þakka sömuleiðis fyrir mig. Tilbreyting að fá að skiptast á skoðunum við fólk án þess að í mann sé hreytt fúkyrðum fyrir það eitt að vera óbreyttur sjálfstæðismaður. 

Sigurður:

Algjörlega sammála. Í Sjálfstæðisflokknum hefur það alla tíð einkennt flokkinn að menn eru ekki sammála. Flokkurinn var stofnaður 25. maí 1929 við samrunna Íhaldsflokksins og frjálslynda flokksins. 

Það er nú reyndar svo núna að líklega er stærsti hluti hins "frjálslyndari" arms flokksins farinn og eftir stendur "íhaldsarmurinn" fyrir utan síðustu móhíkanan á borð við mig. En ég hef fulla trú á að þeir snúi aftur eftir kosningar og í næstu kosningum, nema að þeir stofni nýjan hægri flokk og þá með ESB aðild á stefnuskrá. Við skulum vona að svo verði ekki, því hægri menn eru sterkari í einum flokki en tveimur!

Marco:

Alltaf jafn gaman að láta hreyta einhverju í sig. Kunnið þið vinstri menn engin önnur samskiptaform?

Slagorðið tók ég upp vegna fréttar mbl.is: Til Evrópu með VG. Ég sé ekki betur en að allir séu búnir að opna á ferðalag til Evrópu, með misjafnlega ströngum skilyrðum þó, enda það eina skynsamlega sem hægt er að gera í stöðunni. 

[Sverrir (IP-tala skráð) 22.4.2009 kl. 08:43]

Eins og þú bendir á er þetta fulltrúalýðræði og málefnasuðan í kjölfar kosninga ekki einföld. Þannig er væntanlega rétt hjá þér, ef ég skil þig rétt, að það væri hægt að draga flesta stjórnmálaflokka af stað í átt að ESB með samningahörku að loknum kosningum.

Ég spyr þig - ef þú sæjir ekki heiti á flokkum og ekki gamla kaffispjalls félaga heldur bara málefnin, hvaða flokk myndir þú kjósa ?

Ég er ekki að beina þessu til þín heldur ræða almennt um lýðræðið en ég held að það sé nokkur galli við lýðræðið hvernig menn festast í einum flokk á unga aldri og geta síðan ekki tekið heilbrigða afstöðu til málana. Við slíkar aðstæður þá er það ekki málefnin heldur vanin sem ræður för og á sama tíma verður ekki viðhlítandi endurnýjun á málefnum og fulltrúum, sem er kjarni fulltrúalýðræðisins. Í framhaldi af þessu verða stjórnmálamennirnir kærulausir og gleyma málefninum sem þeir eiga að vinna og fara að rækta kunningjaskap, til að fá aftur kosningu frá sínum vanaföstu kjósendum.

Gangi þér vel að kjósa og velja málefni.  

[Magnús Bjarnason (IP-tala skráð) 22.4.2009 kl. 13:14]

Ég get ekki annað en fagnað og tekið undir skoðun þína að það sé mikilvægt mál að sækja um aðild að ESB. Þetta er þjóðþrifamál sem er lykil af endurreisn íslensks atvinnulífs. Nota Bene ESB er engin töfralausn, vandmál okkar munu ekki hverfa eins og dögg fyrir sólu EN esb aðild mun gera verkefnið ekki jafn erfitt.

Þrátt fyrir að ég sé samfylkingarmaður, þá finnst mér það fáránlegt að Samfylkingin skuli ætla sér að bera þetta mál ein. Það gengur ekki, því þetta er þverpólitískt mál sem þarf að vinna útúr flokkspólitík yfir í málefnahreyfingar eins og Sammála og Heimsýn. Því í flokkspólitískum farveg mun ekki verða neitt af neinu. 

Gangi þér vel 

[marco (IP-tala skráð) 22.4.2009 kl. 18:01]

"Alltaf jafn gaman að láta hreyta einhverju í sig. Kunnið þið vinstri menn engin önnur samskiptaform?"

Hvað er vinstrimaður og hvað er hægrimaður?  Að mörgu leyti held ég að marco sé hægrisinnaðri en þú ert.

Sjálfstæðismaður er allt önnur ella.  Þeir skiptast gróflega í fernt. 

1.  Gæslumenn eigin hagsmuna.  (Þeir sem ráða).

2.  Gæslumenn þeirra sem hafa meiri hagsmuni.  (Leiguþý).

3.  Tækifærissinnar á leið að kjötkötlunum.  (Undirlægjur).

4.  Nytsamir sakleysingjar.  (Jaðargreint fólk og þaðan af verra).

 Svo eru að sjálfsögðu undirflokkar eins og fólk með leiðtogablæti og bólgna þörf fyrir að tilheyra.  (Hjarðeðlisfólkið).