Á hraðleið til Brussel í aðildarviðræður - kosningar að ári

Ég sé ekki annað en að við séum á hraðleið til Brussel í næsta mánuði. Ef rétt er haldið á málum gætu niðurstöður legið fyrir næsta vetur, en þá yrði líklega kosið aftur á næsta ári. Ég efast heldur ekki um að Samfylkingin hefur nú þegar eytt miklum tíma í undirbúning aðildarviðræðna innan Utanríkisráðuneytisins og í reynd verið með málið í forgangi undanfarna mánuði.

Allir þingmenn Samfylkingar (20 þingmenn) eru yfirlýstir stuðningsmenn ESB aðildarviðræðna auk þess sem þetta mál var aðalkosningamál flokksins. Þótt Framsóknarflokkurinn (9 þingmenn) hafi sett aðild mjög ströng skilyrði, samþykkti landsfundur flokksins fyrir sitt leyti að gengið skyldi til viðræðna sem allra fyrst. Tvö af aðal kosningamálum Borgarahreyfingarinnar (4 þingmenn) voru að 7% þjóðarinnar ættu að geta óskað eftir þjóðaratkvæðagreiðslu og að bera skuli alla samninga sem framselja vald undir þjóðaratkvæðagreiðslu. Ég sé því ekki annað en að þeir hljóti að vera ánægðir ef farið er til viðræðna og niðurstaðan síðan borin undir þjóðaratkvæði. Samkvæmt minni talningu er því mjög líklegt að 33 þingmenn greiði atkvæði með því að haldið verði til Brussel í aðildarviðræður.

Þeir sem eru andsnúnir ESB aðildarviðræðum eru 16 þingmenn Sjálfstæðisflokks og 14 þingmenn VG. Reyndar er alveg eins líklegt að einhverjir þingmenn Sjálfstæðisflokksins greiði atkvæði með aðildarviðræðum, þ.e.a.s. ef þeir greiða atkvæði í samræmi við sannfæringu sína. Einnig er ekki útilokað að einhver þingmaður VG greiði atkvæði með viðræðum, þótt það sé ólíklegra. Ég sé því ekki að fleiri en 30 þingmenn geti greitt atkvæði gegn aðildarviðræðum.

Ég efast heldur ekki um að Samfylkingin hafi kannað afstöðu Borgarahreyfingarinnar og Framsóknarflokksins til þessa máls áður en hún gekk frá því við VG. Jóhanna Sigurðardóttir og Össur Skarphéðinsson og fleiri innan Samfylkingar voru ekki að byrja í stjórnmálum í gær! 

Gæti orðið stutt kjörtímabil

Athugasemdir

[Hjörtur J. Guðmundsson, 5.5.2009 kl. 21:25]

Gleymdu því ekki að Framsóknarflokkurinn er bundinn af þeim skilyrðum sem flokkurinn setti fyrir viðræðum við Evrópusambandið. Þingmenn hans geta því ekki stutt slíkar viðræður nema þau skilyrði verði lögð til grundvallar. Til þess að hafa einhverja tryggingu fyrir því að það verði gert þyrfti Framsókn að vera í ríkisstjórn og hafa þannig eitthvað um málið að segja.

[Guðbjörn Guðbjörnsson, 5.5.2009 kl. 21:36]

Það er alltaf hægt að semja við Framsóknarflokkinn. Þetta er eitthvað sem ég hef lært við kynna mér íslenska stjórnamálasögu!

[Kolbrún Baldursdóttir, 5.5.2009 kl. 21:46]

Góð úttekt hjá þér Guðbjörn.
Ég er bjartsýn.

[Jón Aðalsteinn Jónsson, 5.5.2009 kl. 23:04]

Það væri frábært þá er hægt að losna við þessa ríkistjórn og evrópu löngunina á einu bretti kannksi 2010 verði gæfu ár lýðveldisins

[Hjörtur J. Guðmundsson, 5.5.2009 kl. 23:37]

Hvað sem gerist er ljóst að sjálfstæðið verður varið með kjafti og klóm.

[Guðrún Jónsdóttir (IP-tala skráð) 6.5.2009 kl. 00:36]

Vonandi ertu betri söngvari en spámaður.

[Guðbjörn Guðbjörnsson, 6.5.2009 kl. 07:13]

Já, það er í raun mikilvægt að tvennt gerist nú í framhaldinu:

1. Vitræn umræða hefjist um ESB - kosti og galla aðildar og menn hætti skotgrafahernaði.
2. Að aðildarsamningurinn sem slíkur verði skýrður vel út fyrir þjóðinni, þegar hann liggur endanlega fyrir.

Þjóðin á að mínu mati kröfu á því að allar leiðir verði reyndar til að koma okkur út úr þeim ógöngum sem við erum í. Ein af þeim leiðum er aðild að ESB og upptaka evru.

Ég ráðlegg forystu Sjálfstæðisflokksins að leggjast ekki jafn eindregið gegn aðild og hún hefur gert að undanförnu, því slíkt gæti leitt til þess að flokkurinn klofni endanlega. Ljóst er að þegar flokkur minnkar um 1/3 er hann þegar klofnaður, þótt ekki hafi orðið nýr flokkur úr því sem kvarnaðist úr honum.

Ég minni jafnframt á að nokkuð stór hluti þeirra sem enn eru í flokknum eru aðildarviðræðusinnar og of svæsinn og of ósanngjarn og ómálefnalegur málflutningur í garð ESB - líkt og heyra mátti á landsfundinum - gæti orðið til þess að flokkurinn minnkaði enn aftur um 1/3 og endaði í 15-16%. Það er ekki það sem við viljum eða er það nokkuð?

[Guðbjörn Guðbjörnsson, 6.5.2009 kl. 07:18]

Einar:

Veistu það Einar að þetta eykur bjartsýni mína mikið auk þess er gott veður úti. Mér sýnist loksins vera að koma hreyfing á þessi mál og ég held að landsmenn geri sér enga grein fyrir því hversu miklar góðar breytingar ESB aðild gæti haft fyrir okkur. 

[Þorgeir Ragnarsson (IP-tala skráð) 6.5.2009 kl. 07:53]

...ég verð nú að viðurkenna að stundum fæ ég það á tilfinninguna að Össur hafi byrjað í stjórnmálum í gær.

[Gunnlaugur Ingvarsson (IP-tala skráð) 6.5.2009 kl. 08:15]

Þessi ESB hraðlest ykkar á eftir að fara illilega útaf sporin því skal ég lofa þér.

Ég tek undir með Hirti Guðmundssyni hér að ofan að sjálfstæði þjóðarinnar verður varið með kjafti og klóm !

[Sigurgestur Guðlaugsson, 6.5.2009 kl. 08:30]

Þar sem þú ert nú ekki nýgræðingur í pólitík er tvennt sem kemur mér á óvart í pistli þínum. 

Annars vegar gerir þú ráð fyri því að Samfylkingin hafi gert eitthvað nú þegar varðandi aðildarumsókn.  Það kann vel að vera að einhver hafi fengið þetta verkefni í utanríkisráðuneytinu, en ef mark er takandi á verklagi fylkingarinnar í ríkisstjórn er öllu líklegra að þetta sé nú aðallega í kjaftinum á þeim. 

Hins vegar að þú teljir ríkisstjórnina vera búna að vinna hugmyndinni fylgi.  Ég hreinlega efast um það, mér sýnist þetta bara stefna í enn eitt sjónarspilið, þar sem reynt verður að koma ábyrgðinni yfir á hina flokkana.

Ég tek  undir vonir þínar um að farið verði í aðildarviðræður.  Ég vona jafnframt að menn beri þroska til þess að setja þetta ekki í einhvern ómögulegan pólitískan farveg.  Ég deili hins vegar ekki þörfinni fyrir því að hraðinn á þessu máli þurfi að vera of mikill.  Mér finnst ekki sannfærandi að menn vilji ganga til þessara viðræðna með einhverja ímyndaða tímapressu sem aðalamarkmiðið.  Markmiðið á bara að vera að ná góðum samningi.  Ef hann fæst ekki án þess að einhver einn aðili sé í forsæti frekar en annar eru hvort sem er líkur á því að hann fái ekki staðist.  Í þessu hef ég þó ekki áhyggjur, því ég held að þessar viðræður verði mun tímafrekari en gefið hefur verið til kynna, sérstaklega ef við ætlum ekki að sætta okkur við hvaða lausnir sem er í auðlindamálum okkar.  Þetta er langtíma ákvörðun og hana á alls ekki að taka með skammtímasjónarmið í huga.  Við eigum að gefa okkur tíma í þetta.  Annað gildir um þau mál sem harðast brenna á okkur í augnablikinu!

[Ómar Bjarki Kristjánsson, 6.5.2009 kl. 12:36]

Þú ert bartsýnn.

En jú, gæti farið líkt og þú lýsir og ætti að gera það að öllu jöfnu.  Ef allt væri með felldu eins og sagt er.

Málið er bara gamla góða íslenska pólitíkin.  Sjálfstæðisflokkurinn á eftir að vera með málþóf, frammarar eiga eftir að gera einhvern andsk. af sér - en samt auðvitað spurning hvort hægt sé að semja við þá - spurning þá hvað þeir vilja í staðinn o.s.frv.

Svo er bara óljóst hvað Borgaraflokksmenn gera þegar þeir eru orðnir þingmenn.

[Þorkell B. Sigurjónsson (IP-tala skráð) 6.5.2009 kl. 14:25]

Hraðferð inn í ESB, er það gott?  Og getur komið eitthvað gott út úr svoleiðis?  Eða eins og Danir segja; "hasteværk er lasteværk".

Mér finnst það afleit hugmynd að fara í ESB miðað við efnahagslegar aðstæður hér.  Mér finnst einfaldlega of margir líta svo á að ESB-aðild sé einhver kvikk-fix lausn.  

Þetta er svolítið eins og þegar fólk skrifaði undir myntkörfulán á árunum 2006-2007 af því að það langaði svo mikið í nýjan bíl eða hús.  Það varð bara að skrifa undir og það strax til að fá að kaupa það nýja sem því langaði í.  Það sama er með ESB-aðild, við verðum að fá samninginn strax og skrifa undir hann um leiðs svo við komumst inn með hraði.

[Guðbjörn Guðbjörnsson, 6.5.2009 kl. 19:27]

Mikill meirihluti vill viðræður  (Frétt RÚV www.ruv.is - 06.05.2009 18:57)

61,2% þjóðarinnar eru mjög hlynnt eða frekar hlynnt því að hefja aðildarviðræður við Evrópusambandið , samkvæmt könnun sem Gallup gerði fyrir Ríkisútvarpið. 26,9% eru frekar eða mjög andvíg. 11,8% svara hvorki né. 


Stuðningur við aðild er mun meiri í Reykjavík og nágrannasveitarfélögum en á landsbyggðinni. Stuðningur eykst með auknum tekjum og meiri menntun.

Fleiri styðja aðildarviðræður en eru þeim andvígir í öllum flokkum nema Sjálfstæðisflokki. Yfir 90% þeirra sem kusu Samfylkinguna vilja aðild. 47% Vinstri grænna vilja aðildarviðræður en 36% prósent eru þeim andvíg. 41% Sjálfstæðismanna vilja viðræður en 48% eru andvíg.

Þegar spurt er hvort menn séu hlynntir eða andvígir aðild, skiptist þjóðin í nánast jafnstóra hópa. Þeir sem eru hlynntir aðild eru þó litlu fleiri en þeir sem eru andvígir. Ekki er marktækur munur á þeim sem eru hlynntir aðild og þeim sem eru á móti.

Samfylkingin hefur algjöra sérstöðu þegar kemur að áhuga á aðild að Evrópusambandinu. Nærri 80% vilja aðild en aðeins 7% eru á móti. Stuðningsmenn Borgarahreyfingarinnar vilja greinilega aðild en meðal stuðningsmanna hinna flokkanna eru fleiri andvígir en hlynntir.

Könnunin var gerð dagana 29. apríl til 6. maí. Í netúrtaki voru þrettán hundruð manns og var svarhlutfall ríflega sextíu prósent.

[Guðbjörn Guðbjörnsson, 6.5.2009 kl. 19:29]

Sýnir að mínar tölur voru ekki réttar varðandi sjálfstæðismenn, en skv. skoðanakönnun RÚV eru 41% sjálfstæðismanna hlynntir aðildarviðræðum á meðan 48 % er andvíg aðildarviðræðum.

[Guðbjörn Guðbjörnsson, 6.5.2009 kl. 19:49]

Gunnlaugur & Hjörtur:

Sjálfstæði þjóðarinnar verður líklega best tryggt með ESB aðild.

Þið megið alveg hafa ykkar skoðun í friði, en skv. ofangreindum tölum vilja 61,2 %, 26,9 % eru andvíg aðild og 11,8 % svara hvorki né. Meirihluti þjóðarinnar kýs að fara í aðildarviðræður og það kemur mér svo sannarlega ekki á óvart.

Sigurgestur:

Þegar stjórnarviðræður fara fram eru þingmenn allra flokka í óða önn að tala saman á óformlegum nótum. Í slíkum samræðum spyrja menn einfaldlega hvorn annan um afstöðuna í máli sem þessu og í því felast engar skuldbindingar. þetta er það sem ég á við. Miðað við skoðanakönnunina vilja kjósendur Borgarahreyfingarnar endilega í ESB viðræður líkt og ég sagði og sama má segja um kjósendur Framsóknarflokksins.

Mér finnst nú frekar líklegt að forysta þessara flokki hlusti á þjóðina sína og kjósendur sína. Ég veit að það er ekki til siðs hjá forystu allra flokka að hlusta á grasrótina. Davíð Oddsson gekk t.d. svo langt á landsfundi Sjálfstæðisflokksins 1996 að segja að hlustaði maður of mikið á grasrótina gætu eyrun fyllst af ormum. Þótt Geir H. Haarde hafi hlustað eilítið meira á grasrótina, hélt að mestu sama verklagi og Davíð. Nú verðum við bíða og sjá hvað Bjarni Benediktsson gerir, en mér finnst að hann ætti að hlusta á núverandi og fyrrverandi sjálfstæðismenn.

Lengst af vorum við sjálfstæðismenn með 36 % fylgi, en 1/3 af þeim kjósendum sem til þessa hafa kosið Sjálfstæðisflokkinn gera það ekki lengur og við erum í 24%. Af þessum 24% vilja 4 sjálfstæðismenn af hverjum 10 viðræður við ESB, 5 eru andvígir og einn er ekki alveg viss. Þetta þýðir í raun að 10 % af þessum 24 % vilja viðræður, 12 % eru andsnúnir og 2 % vita ekki sitt rjúkandi ráð. Hvað gera 10 % og 2 % ef forusta flokksins tekur einarða afstöðu gegn ESB aðildarviðræðum?

Ef þú spyrð mig hvað ég geri mun svara þér að ég mun ekki styðja flokkinn meir og reyna að stofna nýjan hægri flokk með þessum 10 % sem vilja aðildarviðræðum og þeim 12% sem eru farin.

[Guðbjörn Guðbjörnsson, 6.5.2009 kl. 21:18]

Einar:

Nei, ég held að þessi skoðanakönnun sé nokkuð marktæk.

Auðvitað er fólk spenntara fyrir viðræðum en aðild.

Ég gæti ekki svarað játandi við aðild, en vil samt í aðildarviðræður.