Er Geir á öndverðum meiði við meirihluta sjálfstæðismanna ?

Ég var á þessum fundi í Valhöll, þar sem Geir Hilmar Haarde sagði sína skoðun á aðildarviðræðum og aðild að ESB og kom sú skoðun engum fundarmanna á óvart. Það verður þó að teljast ótrúlegt að á meðal þeirra 25 þingmanna, sem sitja á Alþingi fyrir hönd flokksins, virðist ekki vera einn einasti, sem viðurkennir að vera á báðum áttum varðandi aðild að ESB. Aðeins einn þingmaður flokksins hefur talað um að réttast væri að ræða málin til hlítar innan flokksins og skoða í framhaldinu, hvort gengið yrði til þjóðaratkvæðagreiðslu um aðildarviðræður við ESB. Þarna á ég að sjálfsögðu við Þorgerði Katrínu Gunnarsdóttur menntamálaráðherra.

Þarna var í reynd um svo varfærnislega nálgun að hálfu menntamálaráðherra að varla er hægt að tala um hallarbyltingu. Hugmynd hennar virðist vera að ræða málin fyrst ofan í kjölinn innan grasrótar flokksins og komast til botns í því hvað sjálfstæðismenn virkilega vilja gera í þessu máli. Þorgerður virðist vera þeirra skoðunar, að flestir sjálfstæðismenn yrðu velflestir andvígir aðild að vel skoðuðu máli og má það vel vera rétt athugað hjá henni. Væru flestir sjálfstæðismenn hins vegar þeirrar skoðunar að ganga skyldi til viðræðna, þá yrði málið að öllum líkindum tekið fyrir á næsta landsfundi, sem ályktaði um hvort farið yrði í þjóðaratkvæðagreiðslu um aðildarviðræður eða ekki. Að síðustu myndu niðurstöður aðildarviðræðna bornar undir þjóðina. Er þetta ekki mjög lýðræðisleg nálgun og búum við ekki í lýðræðisríki? 

Hversvegna vilja forystumenn Sjálfstæðisflokksins ekki horfast í augu við þá staðreynd, að þetta mál er á dagskrá þjóðarinnar, þótt það sé kannski ekki á dagskrá þingflokks Sjálfstæðisflokksins eða annarra stjórnmálaflokka? Hversvegna segja forystumenn Sjálfstæðisflokksins, að flokksmenn megi auðvitað ræða þessi mál sín á milli, en að það skipti í raun engu máli, þar sem við séum ekkert á leiðinni inn í ESB, hvort sem er. Þjóðin er reyndar búin að vera ræða þessi mál lengur en í nokkrar vikur eða mánuði, þótt auðvitað hafi ástandið í efnahagsmálum hleypt miklu lífi í þá umræðu. Vita þeir eitthvað, sem við flokksbundnir sjálfstæðismenn og aðrir kjósendur Sjálfstæðisflokksins vitum ekki? Er ekki landsfundur eftir rúmlega eitt ár og er hann ekki æðsta vald flokksins og ákvarðar stefnu hans. Eru ekki kosningar eftir þrjú ár og ákveður þjóðin þá ekki hvaða stefna er tekin?

Ég þekki núverandi stefnu flokksins í málefnum ESB, því ég sat fundi um það mál á síðasta landsfundi. Það er ekkert launungarmál að deilt var um orðalag á fundum nefndarinnar og að fjölmargir sjálfstæðismenn voru þeirrar skoðunar, að það orðalag - sem að lokum varð ofan á - gengi ekki nógu langt varðandi nálgun flokksins í átt að ESB aðild eða a.m.k. aðildarviðræðum. Ályktunin var hins vegar samþykkt eftir að sátt náðist um orðalag. Þannig er sem betur fer unnið innan Sjálfstæðisflokksins. Ég er ekki viss um að ályktunin væri orðuð á sama hátt í dag, en það er auðvitað rétt hjá Geir Haarde, að vissulega erum við bundnir af þeirri ályktun, sem samþykkt var á sínum tíma.

Það sem ég bað um á fundinum áðan var að farið yrði í opna og upplýsta umræðu um ESB málin, því þetta yrði mál málanna á næsta landsfundi og í næstu kosningum og auðvitað þyrfti allri umræðu um máið að vera lokið í grasrótinni áður en málið færi á landsfund eða þangað til kosninga kæmi. Að mínu mati væri góð byrjun og rétt nálgun í þessu máli að standa fyrir opnum fundum, þar sem tveir eitilharðir sjálfstæðismenn á borð við Pétur Blöndal og Þorstein Pálsson yrðu frummælendur og tækjust á um þessi mál, en þeir eru auðsjáanlega á öndverðum meiði í þessum máli.

Geir var ekki sammála þessari nálgun minni og sagði að Sjálfstæðisflokkurinn væri ekki málfundafélag og stæði ekki fyrir fundum af þessu tagi. Flokkurinn stæði aðeins fyrir fundum, þar sem stefna flokksins og sjónarmið væru kynnt. Ég hélt að upplýst umræða um stjórnmál ætti einmitt heima innan sjálfstæðisfélaganna, innan fulltrúaráðs og annarra stofnana flokksins. Geir vísaði þeim til stjórnmálaskóla flokksins. Þessu er ég ekki sammála, en hugsanleg hef ég eitthvað misskilið starfið innan Sjálfstæðisflokksins.

Að mínu mati hefur sú stjórnmálaumræða, sem farið hefur fram innan flokksins ESB-aðild, einkennst af því, að harðir andstæðingar ESB aðildar telja upp gallana við aðild og minnast ekki einu orði á kostina. Þeir tímar eru hreinlega liðnir að landsmenn - og gildir þá einu hvar í flokki menn eru - láti bjóða sér að flokksforustan prediki yfir þeim sína skoðun og síðan samþykki hjörðin það umræðulaust.

Í máli sem þessu þarf hinn venjulegi flokksmaður og kjósandi Sjálfstæðisflokksins sjálfur að vega og meta kosti og galla ESB aðildar og mynda sér í kjölfarið sjálfstæða skoðun - annað er ekki boðlegt. Fulltrúalýðræði er gott og gilt, en í málum sem þessum þarf þjóðin sjálf að eiga síðasta orðið og því þarf hvorutveggja til þjóðaratkvæðagreiðslu um hvort ganga á til aðildarviðræðna, alþingiskosningar, þar sem stjórnmálamenn allra flokka segja hvaða afstöðu þeir hafa til þessa stóra máls og síðan atkvæðagreiðslu um hvort þjóðin vill gerast aðili að ESB.

Með góðri kveðju,

Guðbjörn Guðbjörnsson

Geir: Ég vil ekki ganga í ESB

Húrra - Þorgerður Katrín

Loksins þorir einhver af forystumönnum Sjálfstæðisflokksins að tjá sig um mál líðandi stundar.

Auðvitað höfum við sjálfstæðismenn miklar áhyggjur af borgarmálum Reykjavíkur, nema hvað!

Sömu sögu má segja um frétt RÚV í 10 fréttum, þar sem Þorgerður Katrín var sýnd talandi um að Evrópumálin yrðu á dagskrá næsta haust hjá Sjálfstæðisflokknum um land allt.

Takk Þorgerður Katrín - loksins hlustar einhver á okkur, sem hugsum öðru vísi í Sjálfstæðisflokknum og við erum alls ekki svo fá!

Mín skoðun er að stór hluti sjálfstæðismanna hafi beðið eftir þessari yfirlýsinu undanfarið ár eða svo!

Kær kveðja, Guðbjörn Guðbjörnsson

Hefur áhyggjur af borgarmálum

Aðgát skal höfð í nærveru sálar

Sumt af því bloggi, sem ég las við þessa frétt fannst mér mjög óviðkunnanlegt, t.d. hvort ekki væri um eðlilega hreinsun að ræða? Ég veit ekki nákvæmlega hvað viðkomandi gekk til, en ég veit að ég hef ekki áhuga á slíkri hreinsun fyrir mig og mína.

Auðvitað var viðbúið að einhverjar uppsagnir fylgdu í kjölfarið á þessum "samdrætti" í þjóðfélaginu og þá sérstaklega í bankakerfinu. Ég vil ekki tala um núverandi ástand sem "kreppu" fyrr en atvinnuleysið hefur náð a.m.k. 5%, sem verður líklega ekki tilfellið í þessari "efnahagslægð". Ég er einnig sammála að um að þetta fólk mun allt fá ágætis vinnu á næstu mánuðum, því enn virðist vera nokkur eftirspurn eftir vinnuafli í þjóðfélaginu.

Ég er spenntur, hvort það vinnuafl, sem flykkst hefur til landsins á undanförnum árum yfirgefur landið í raun og veru. Ef það gengur upp má búast við að efnahagslífið nái "fyrra jafnvægi" og þá voru þær ráðstafanir, sem gripið var til varðandi innflutning á vinnuafli til virkjunarframkvæmda fyrir austan réttar. Ef vinnuaflið fer ekki heim og við sitjum uppi með þúsundir útlendinga á atvinnuleysisbótum og jafnvel stærri félagsleg vandamál, var auðsjáanlega um ranga aðgerð að ræða.

Ég er ekki svartsýnn á framtíðina og segja má að hagnaðartölur bankanna fyrir síðustu mánuði hafi verið góðar fréttir - þótt það hljómi vissulega í sjálfu sér einkennilega í mínum eyrum. Nokkur hluti þessa gróða var gengishagnaður, sem mun ekki endurtaka sig í næsta uppgjör - vonandi ekki!

Það sem ég vildi sagt hafa er, að við þurfum að bera virðingu fyrir því fólki, sem sagt var og verður upp vinnu í þessum "tímabundnu erfiðleikum". Ég hef sem betur fer aðeins orðið einu sinni fyrir slíkri uppsögn á þeim þremur áratugum, sem ég hef unnið, en það var í síðustu "niðursveiflu" árið 2001. Það var mjög erfið lífsreynsla, sem ég óskaði ekki mesta óvini mínum. Sem betur fer fékk ég vinnu eftir aðeins tveimur mánuðum seinn, svo ég missti hvorki húsið eða lenti í meiri háttar fjárhagslegum erfiðleikum.

Í einu blogginu las ég að "gott fólk" fengi alltaf aftur vinnu. Þetta er rétt, en við þurfum einnig að hjálpa því fólki, sem ekki passar inn í þessa skilgreiningu, hverjir sem annars falla undir skilgreininguna - er ég gott fólk?

Kveðja, Guðbjörn Guðbjörnsson

Umfang uppsagna kom á óvart

Nú er fokið í flest skjól!

Hver hefði trúað því fyrir nokkrum árum síðan, að stuðningsmenn inngöngu Serbíu í ESB hefðu þar betur í þingkosningum?

Hvenær ætli menn vakni hér á landi og fari þó það væri nú ekki nema að hefja metnaðarfulla og vandaða umræðu um kosti og galla ESB aðildar og möguleika á því að Íslendingar skoði aðild að ESB.

Kveðja, Guðbjörn Guðbjörnsson

Stuðningsmenn ESB höfðu betur

Ekki hægt að fá þetta ódýrara

Ég held einmitt að engin leið sé að fá varnir á ódýrara verði en við erum að gera, en ég ef ég hef skilið málið rétt, erum við einungis að borga mat og húsnæði fyrir þessa hermenn.

Veit fólk almennt hvað kostar að fljúga fjórum svona vélum á hverja klukkustund? Ég veit það ekki en ég veit að rekstur á einni svona vél kostar meira en nokkurn grunar. Það var í raun snilldarbragð af ríkisstjórninni að semja við önnur ríki um þetta eftirlitsflug, en að sjálfsögðu þurfum við á slíku eftirliti að halda eins og aðrar þjóðir. Eru nágrannaþjóðir okkar Norðmenn, Svíar, Finnar og Danmörk með her, sem kostar offjár aðeins að gamni sínu? Enginn stjórnmálaflokkur í þessum löndum, sem vill láta taka sig alvarlega, kemur með svona merkingarlaust gaspur fram. 

Það hljóta allir að sjá í hvaða gír Rússar eru komnir í. Staðreynd er að eftir tveggja áratuga tímabil niðurlægingar eru þeir óðum að jafna sig og eru enn stórveldi á sviði hernaðar. Það er barnaskapur einn að gera lítið úr þeirri staðreynd. Yfirráð yfir Norður-Atlantshafi eru mikilvæg og enginn skyldi halda að Frakkar, Norðmenn og meira að segja Pólverjar væru að leggja út í kostnað við að koma hingað ef þeir áttuðu sig ekki á þessari staðreynd og Bandaríkjamenn voru hér ekki áratugum saman af ástæðulausu. Persónulega held ég að Bandaríkjamenn eigi eftir að átta sig á því þegar nýjar siglingaleiðir til Asíu opnast og baráttan um auðlindir á Norðurpólnum hefst, að það voru regin mistök að yfirgefa varnarstöðina.

Kveðja, Guðbjörn Guðbjörnsson

Koma Frakka liður í Evrópuvæðingu öryggismála Íslands

Eðlilegt eftir langt þensluskeið

Ég veit ekki betur en að kólnun hafi verið spáð um nokkurn tíma og allir máttu svo sem vita að þetta svokallaða góðæri gat ekki gengið áfram endalaust. Framkvæmdunum fyrir austan er nú lokið og einnig stækkun Norðuráls og síðan var einnig ljóst að einhvern tíma myndi hægja á útrásinni.

Þótt ég hafi kannski oft verið bjartsýnni á undanförnum árum, sé ég þó ekki það svartnætti, sem margir virðast sjá. Í raun held ég að það sé frekar bjart framundan og minni í því sambandi á framkvæmdir í Helguvík og hugmyndir um uppbyggingu iðnaðar í Þorlákshöfn og á Húsavík. Þá er ekki útilokað að atvinnumál á Vestfjörðum leysist ef þar verður af byggingu olíuhreinsunarstöðvar. Það er líklegt að einhver fyrirtæki lendi í tímabundnum erfiðleikum og jafnvel að einhver verði gjaldþrota, en að hér sé allt á heljarþröm er mjög fjarri sannleikanum.

Með kveðju, Guðbjörn Guðbjörnsson

Kaupmáttur rýrnar í tvö ár

Kaldari vetur en undanfarin ár

Tilfinning mín segir mér að vetur í veturinn hafi verið kaldari og erfiðari en í langan tíma. Er þetta bara vitleysa í mér? Ég var einmitt að velta fyrir mér hvaða útskýringar vísindamenn kæmu með varðandi þennan kalda og erfiða vetur og þá m.t.t. kenningarinnar um hlýnun jarðar.

Kv. Guðbjörn Guðbjörnsson

Góður gróður í sumar

Góð lausn - allir halda andlitinu

Ég er algjörlega sammála að Guðlaugur Þór Þórðarson og embættismenn heilbrigðisráðuneytisins eiga heiður skilinn fyrir að höggva á þennan hnút.

Ég hef persónulega reynslu af því hversu erfitt er að leysa mál sem þessi þegar þau eru komin í hnút og eina lausnin er að allir verða í raun að gefa eftir og sýna skynsemi.

Kv. Guðbjörn Guðbjörnsson

Allra vilji að leysa málið

1. maí - svona á að gera þetta !

Ég verð að segja að ég er himinlifandi yfir þessum úrslitum og þá á ég við alla lausn þessa máls. Auðvitað var enga lausn að hafa fyrr en alveg í lokin, þar sem þessi deila var komin í algjöran hnút. Það sem er svo fallegt við þessa lausn er að ráðherra og stjórnendur sjúkrahússins áttuðu sig að lokum á því að svona er ekki hægt að umgangast fólk. En það er ekki það sem er ekki, heldur að hjúkrunarfræðingar og aðrir áttuðu sig einnig á því að eina leiðin í svona málum er leiðin til sátta.

Það sem stjórnvöld  og forstöðurmenn þurfa loksins að átta sig á er að þegar breytingar eru fyrirhugaðar er nauðsynlegt að hafa fyrr samband við stéttarfélög og starfsmenn. Nútíma starfsmenn einkafyrirtækja og ríkisfyrirtækja sætta sig ekki við þá hegðun, sem sýnd  var hér áður fyrr og hefur sýnt sig aftur undanfarnar vikur, mánuði og ár - við krefjumst virðingar vinnuveitenda fyrir okkar kröftum og þá sýnum við ykkur sömu virðingu! Fyrirtæki og stofnanir verða að átta sig á því að án okkar - starfsmannannna - eru þau algjörlega máttlaus og kraftlaus - við erum jafn sterk og mikilvæg og fyrirtæin sjálf! Ef þið áttið ykkur ekki á þessu, þurfið þið öll að fara til Kína eða Indlands og þá vantar ykkur okkur til að okra á! Í "hyperkapítalisma" undanfarinna ára virðist þetta hafa gleymst!

Mætum öll á morgun í 1. maí gönguna - ég verð með BSRB fánann ...

Kveðja,

Guðbjörn Guðbjörnsson,

formaður Tollavarðafélags Íslands

Vaktakerfið dregið til baka

Tek ofan af fyrir Guðlaugi ...

Verð að segja að ég tek ofan af fyrir Guðlaugi að bakka út úr þessu máli svo snemma og reyna að ná sáttum. Við sem höfum staðið í enn stærri baráttu varðandi embætti Lögreglu- og tollstjórans á Suðurnesjum hefðum óskað eftir svipaðri lausn í okkar máli. Þar var enginn til í að bakka út úr fyrri yfirlýsingum. Kv. Guðbjörn Guðbjörnsson

Mikilvægt að lausn finnist